MohammedSharaf's Blog

كثيرا ما أتسائل لم يتأخّر فتح المسجد الأقصي حتي الان؟!

نعم المسلمين أكثر بكثير من اليهود.

نعم اليهود هم أجبن خلق الله.

…

و لعل الذي يُرجئ نصر المسلمين و تحريرهم للمسجد الأقصي، هو عدم استيعاب بعضا من كلام الله و وعوده و منهم تلك الآية.

يقول تعالي: {وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ } سورة العنكبوت 69

علّق الله الهداية بالجهاد، فأكمل الناس هداية أعظمهم جهادا، و أفرض الجهاد:

-        جهاد النفس

-        جهاد الهوي

-        جهاد الشيطان

-        جهاد الدنيا

فمن جاهد هذه الأربعة في الله هداه الله سُبل رضاه المتواصلة إلي جنته، و من ترك الجهاد فاته من الهدي بحسب ما عطّل من الجهاد.

الذين جاهدوا بأهواءهم في الله بالتوبة ليهديهم الله سبل الإخلاص، ولا يتمكن من جهاد عدوه في الظاهر إلا من جاهد هذه الأعداء باطنا، فمن نُصر عليها نُصر علي عدوه، و من نُصرت عليه نُصر عليه عدوه.

فقبل أن تسأل لم تأخّر النصر، اسأل نفسك

هل أديّت واجباتك اليوم؟

هل قضيت يومك بدون تضييع الوقت؟

..

{وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ }

المصدر: كتاب الفوائد لابن القيّم

من يومين كنت في شيراتون، و بالتحديد في مسجد الصديق في صلاة العشاء. بعد الصلاة و أنا نازل علي السلّم لقيت راجل بشبّه عليه (كنت شايفه من ضهره) بس علي طويل شوية، بعدين قلت أكيد مش هو، ايه اللي هيجيبه هنا يعني.

لقيته فتح باب كده علي الشمال المفروض انه باب دار المناسبات، و انا كنت فاكر ان الموضوع خلص بقي، طلعت برّه المسجد بجيب حاجة من الكشك اللي جنب المسجد، و ببص علي دار المناسبات من برّه كده، ده هو فعلا!! فضلت فترة مش قليلة واقف كده و مُسبهل و كأني عامل زي المبرمج اللي طلعتله Bug مكنش متوقعها.

الرجل ده كان هو دكتور راغب السرجاني، الرجل ده بحبه حب شديد جداا و بسمعله كتير و بيأسرني بطريقته و هو بيتكلم عن قصص تاريخية و خصوصا الأندلس، التتار و الحروب الصليبية، و كذلك موضوع "كيف تصبح عالما" اللي بحب أسمعه مرارا و تكرارا بلا كلل أو ملل.

طب ايه الفايدة يعني من موضوع زي كده؟ احنا مالنا ؟!

كان فيه أغنية زمان لصباح اسمها "أنا شفت جمال"، و كانت الأغنية كلها بتدور ان الصبّوحة كانت في البلكونة و شافت الموكب بيهلّ عليهم و قد ايه الدنيا كانت مش سايعاها لما شافته بقي.

الأغنية دي بقي خلتني و انا راكب العربية و مروّح بقول "أنا شفت راغب، أنا شفت راغب"

بس ده كان بجد بقي و كنت فعلا فرحان جدا، أي نعم انا كنت شفته قبل كده في دروسه، بس عشان كنت متوقع أني أشوفه انما هنا كان فيه عنصر المفاجأة.

هو بيكون شعور فرح و تقدير شديدين، و علي فكرة أنا بحس نفس الأحساس كل يوم و أنا في الكلية، لما الواحد يشوف فطاحلة المعيدين قدامه أو الدكاترة اللي شعرهم شاب في طلب العلم أو حتي الطلاب اللي بيتعلموا بجد، سواء قده أو أصغر منه.

ربنا يوفقنا كلنا كده ان شاء الله و نبقي علماء بجد، و ننفع الأمة ان شاء الله

الجو كان حلو جدا، أهلي كانوا بيقولوا ان الدنيا برد، بس انا كنت مبسوط، عشان طول عمري بحب البرد بس محبتوش بقي لما جيت أستحمي علي الفجر كده (وقت الاستحمام المُفضّل بالنسبة لي) و قعدوا يحذروني من السخان، قولتيلهم مش هو شغال ؟ قالوا اه بس .. انا مهتمتش باللي بعد “بس” ده، و للأسف اتنفخت  دخلت الحمام المتواضع و شغلت السخان راح اشتغل، فقلت جوايا بثقة الحمد لله، مطلعش زي ما كانوا بيخوفوني يعني، و إذ فجأة ألاقي المياه بتكهربني، يالهويييييييي، أتاري السخان الكهربا ده قديم قوي و بايظ ف لما بيسخن قوي بيكهرب المياه، طبعا كان شعور وحش قوي و درس قاسي جدا الصراحة مش لأني اتكهربت بس لأ لأني اضطريت أكمّل بمياه ساقعة بقي .

البيت رائع جدا، بيمثّل العراقة ، قعدت أصور شوية صور، كنت مستمتع فعلا بالقعاد فيه.

فيه مميزات كتير جدا في البلد صعب انك تلاقيها بالحجم ده في القاهرة، أو أنك تلاقيها من الأساس:

-         شدة الكرم: كنت أسمع عن اللي بيتقال ان الشرقية أهلها كرما جدا و كده، بس مكنتش مُتخيل ان بالمنظر ده الصراحة، مفيش واحد في البلد تقول له "سلام عليكم" إلا و يقولك " و عليكم السلام، اتفضل" و علي فكرة بتبقي بجد و جد جداا كمان، ده أنا قابلت واحد قريبي في المسجد، سلّمت عليه و خلاص كله تمام، لقيته بعد الصلاة مستنيني برّه بيقولي اتفضّل، و هو كان لسه راجع من برّه يعني ميعرفش بيته فيه أكل أصلا ولا لأ، بس يا سيدي طلعنا، و أنا كنت لسه واكل سمك و داببها علي الاخر قويييييي  راسه و ألف سيف اتغدي معاه، و الغدا كان محشي كرنب، و عينك ما تشوف الا النور . علي موضوع اتفضّلوا ده، كنت ماشي مع ابن عمتي لقينا واحد راكب علي الحمار ف بقول له سلام عليكم، قال لي و عليكم السلام اتفضلوا، ده بقي كنت حاسّه حافظ مش فاهم.

-         الجو النضيف: لا يخفي عليكم ان الجو في الريف عامة بيبقي نقي جدا، و ده من أكبر الأسباب اللي بتخلّي الواحد يلجئ للسفر للأرياف.

-         الهدوووووء: و اللي من أكتر الحاجات اللي بحبها في حياتي كلها هي الهدوووء، هناك مفيش دوشة خالص، و لو لقيت دوشة في حتة تقدر بكللل سهولة تهرب منها.

-         الخضرة: كنت فعلا في لحظة من أجمل لحظات حياتي لما رحت الجنينة بتاعتنا و اتفرّجت عليها بل و قطّفت منها كمان، ملينا 3 أشولة كاملة. و كان شعور لا يوصف لما كلت من اليوسفي و انا هناك، تخيّل كده لما تاكل فاكهو في بيتك و تقول ياااه ده الفاكهة دي طازة قويييي، فما بالك بقي و انت بتاكل الفاكهة من و هي علي الشجرة !! و علي رأي واحد صاحبي "أمال برتقان الجنة هيبقي عامل ازاي بقي!!" يارب ارزقنا جميعا ان شاء الله

-         الحيوانات: اه الحيوانات، حاجة ظريفة جدا لما طول منتا ماشي تلاقي حمار أو معزة أو جاموسة و يبقي البيت اللي جنبك مربيين فيه طيور تجري منهم فرخة و تخش بيتك، العيال يجروا وراها لحد ما يوصلوا ليها تكون باضت يقوم أصحاب الفرخة دي يدوك 6 بيضات منهم (أمال هما كام ؟) و عمتك تاخد البيض و تقليه في لحظتها كده، بيض طازة صحيح.

-         الباب اللي مبيتقفلش: الباب بتاع البيت مكنش بيتقفل غير بليل عشان ننام، طول النهار أهالينا أو جراننا أو ناس من البلد يجوا زيارة، و لا هما بيحتاجوا دعوة عشان يجوا و لا أهل البيت بيتعبوا من وجود ضيوف باستمرار، و مش عايز أقولكم اللي كان بيجي كان بيتظبّط جامد .

-         التأمل: أكيد محدش هيقعد في وسط الطبيعة دي كلها و ميقعدش يتفكّر في خلق الله و الخضرة و الحيوانات و الفاكهة و النجوم (اللي مش بتتشاف بالمنظر ده في القاهرة).

- الأكل الطازة: زي البيض و البرتقان كده، خلي بالك انت في البلد يعني اي حاجة عايزها تقطف و تاكل علي طول، نموذج مُصغّر جدااااااااااااااااااااااا من الجنّة (ان شاء الله)

كان لفت نظري بردو و انا في الجنينة، ان المياه اللي بتسقي الأرض ماشية كده بشكل خلاني أفتكر "تجري من تحتها الأنهار"، يارب كلنا ندخل الجنات دي و نتمتع بيها مع الرسول و الصحابة ان شاء الله

مش عارف انا عجبني الزرع و الجناين واللون الأخضر عشان زي ما بيتقال انه مريح للعين و كده و لا عشان الدم الفلاحييسري في شراييني

من فترة قريبة سافرت البلد، و كنت سعيدجدا اني هروح منطقة ريفية أستريح فيها من عناء الأصفار و الوحايد، و أريح أعصابيحبتين. دي تقريبا رابع مرة أروح البلد من يوم ما اتولدت، بجد حاجة رائعةجدا. البلد اسمها “شيبة قش” تبع مركز منيا القمح،محافظة الشرقية. تعالوا بقي لما أعرفكم ببعض الشخصيات البارزة في البلد:

1-     زكريا و يحي عزمي: طبعا دول أغنياء عن التعريف تماما، الغريب في الأمر ان جوز عمتي متربي معاهم و لما كبروا شوية اشتغل مع حسني مبارك و زكريا عزمي 17 سنة كاملة، قبل ما يتحولوا أعوذ بالله .

القصر بتاعهم في البلد كانوا مربيين فيه أسد، و كلاب حراسة مفترسة، و من فترة قريبة لما جت لجنة الكسب الغير مشروع تعاين القصر و كده فتح الأقفاص بتاعت الكلاب و ضرب عليها نار عشان تهاجم الناس اللي جاية تعاين، شوفوا هنا. و لو عايزين تعرفوا تفاصيل أكتر عن حياة زكريا عزمي شوفوا هنا.

2-     عبدالعاطي (صائد الدبابات): للي مش عارف عبد العاطي، ده مقاتل في حرب 73 دمّر لوحده 23 دبابة، و اسمه بالكامل محمد عبد العاطي عطية شرف.

هنا فيه فيديو حلو قوي قوي قوي عنه، و فيه بعض اللقطات من البلد زمان لو حد عايز يشوفها.

أحكلكم بقي عن الأحداث اللي حصلت و انا هناك في البوست الجي بقي ان شاء الله

انتظرونا